Միգրենը հղիության ժամանակ. morevmankan.am

Միգրենը բարորակ հիվանդություն է, որը չի ազդում հղիության ընթացքի և պտղի զարգացման վրա: Բայց նաև հղիության ու միգրենի համակցումը պահանջում է պատասխանատու վերաբերմունք, հատկապես հաճախակի (շաբաթը 2-ից ավելի) նոպաների ժամանակ:

Քանի որ.

• օգտագործման համար թույլատրված դեղերը քիչ են,
• միգրենի բուժման և կանխարգելման մոտեցումները խիստ անհատական են և կախված են հաճախականությունից, ծանրությունից, գլխացավի տևողությունից:

Ընդհանրապես, միգրենով տառապող հղիների 60-70%-ի մոտ գլխացավի նոպաները մեղմանում են, դառնում հազվադեպ կամ լիովին անցնում են երկրորդ և երրորդ եռամսյակում: Դա կապված է էսթրոգենների մակարդակի կայունացման հետ: Երկրորդ եռամսյակի սկզբում այն բարձրանում է 6 անգամ և տատանումները դադարում են:

Կանանց մյուս մասի մոտ հղիության ընթացքում կամ միգրենը մնում է անփոփոխ, կամ ընթացքը վատանում է: Բայց որքան հղիության ժամկետը մեծանում է, այնքան այդպիսի կանանց թիվը նվազում է.

• Առաջին եռամսյակում վատացում դիտվում է 18%-ի մոտ,
• երկրորդում՝ 12%-ի մոտ,
• երրորդում՝ 9-%-ի մոտ:

Եթե առաջին եռամսյակի վերջում նոպաների հաճախականությունը և ծանրությունը պահպանվում են, ապա հավանական է, որ այդ գլխացավերը կնոջը կանհանգստացնեն ամբողջ հղիության ընթացքում և ծննդաբերությունից հետո ևս:

Միգրենի վերահսկումը հղիության ընթացքում

Կարևոր է նոպաների վերահսկումը և բժշկի հսկողությունը.

• Պետք է կատարել բժշկի հրահանգները` կապված ապրելակերպի հետ,
• կարգավորել քունը,
• շատ հեղուկներ օգտագործել,
• սնվել միանվագ և հաճախակի,
• ճիշտ կազմակերպել հանգիստը,
• խուսափել սթրեսային վիճակներից,
• գլխացավերի մասին օրագիր պահել:

Միայն այս պարզ հրահանգների կատարումն արդեն կարող է նվազեցնել նոպաները:

Ինչպե՞ս հանել նոպաները.

• ցանկալի է գերադասությունը տալ ոչ դեղորայքային միջոցներին,
• սրտխառնոցի ժամանակ կարող են օգնել չոր թխվածքաբլիթը (պեչենի), կոճապղպեղը կամ խնձորի խյուսը,
• ջրազրկման դեմ օգտագործել ջրով նոսրացված հյութեր կամ այլ հեղուկներ,
• քունը, զբոսանքը կամ շնչառական բարժությունները նույնպես կարող են օգնել,
• կարելի է օգտագործել Ցեֆալի սարքը, որը կօգնի թեթևացնել գլխացավերը,
• եթե նոպաներն արտահայտված են, ապա բժիշկը խիստ վերահսկողությամբ պետք է դեղորայք նշանակի:

Ամենաանվնաս դեղը համարվում է պարացետամոլը, որը կարելի է օգտագործել ամբողջ հղիության ժամանակ: Մյուս բոլոր դեղերը որոշակի մոտեցումներ են պահանջում:

• Իբուպրոֆենը կարելի է ընդունել երկրորդ եռամսյակում, բայց առաջին եռամսյակում այդ դեղի օգտագործումը պետք է սահմանափակել, իսկ երրորդ եռամսյակում հակացուցված է:
• Ասպիրինն արգելվում է երրորդ եռամսյակում և ցանկալի չէ նրա ընդունումը նաև առաջին և երկրորդ եռամսյակներում` խիստ անցանկալի ազդեցությունների պատճառով:
• Խստիվ արգելվում են էրգոտամինը և օպիոիդային անալգետիկները:
• Տրիպտանները չեն թույլատրվում հղիության ժամանակ, քանի որ անհրաժեշտ հետազոտությունները բացակայում են, թեև այդ դեղերն ինքնուրույն օգտագործող կանանց մոտ պտղի վրա բացասական ազդեցություն չի դիտվել:

Բացի պարացետամոլից՝ խորհուրդ չեն տրվում այլ դեղեր առանց բժշկի նշանակման:

Ե՞րբ դիմել բժշկի.

• եթե միգրենն սկսվել է հղիության ընթացքում,
• եթե նոպաները դարձել են հաճախակի և ինտենսիվ,
• եթե աուրան դարձել է երկարատև և արտահայտվել է առաջին անգամ,
• եթե գլխացավն արագ ուժեղանում է և ունի անսովոր բնույթ,
• եթե գլխացավերի ժամանակ բարձրացել է ճնշումը:

Հարցեր, պատասխաններ, մեկնաբանություններ